غريب الحب أما بيتفشكل
بتلاقي حال الدنيا اتشقلب
لما هيحصل فبتستتقل
إنك يوم لسيرتها تقرب
وبعد ما كانت هي الدنيا
تسمع عنها فبتستغرب
تحس انها مش نفس الشخص
بعد فراقوا خلاص اتبدلت
إزاي الحب اتقلب العكس
وإنت نستها وهي إستغنت
كإنها معرفتكش في يوم
ولاكنت شغالها طول الوقت
مش فارقة من فيكم مظلوم
هي البايعة أو إنت زهقت
ياما قلتوا مروة وحبيبها
دول علاقتهم راح تتفركش
معاها دلوقتي كوكو وصحابها
وبتعمل سبوع الواد بوشبوش
حتى الواد صاحبكوا الندل
ال ماطقش بينكوا الحب
بقى فجاءة أخوها والخِل
وإنت الواطي وديل الكلب
كان لازم يعني تحبها حب
قصيدة نانا لهشام الجخ؟
أديك بقى أخرك قرطاس لب
مش هتشوفك أجدع أخ
ياريتك كنت محابتهاش
كنت تسلم بس وتمشي
أقله كنت ماتخسرهاش
ومايبقاش دورك كيس شيبسي
فاكر يوم قلتلها سيبيني
لازم يأخدك أحسن مني
كات بتقولك أنا ماقدرش
وتصدقها وهي تغني
طب فاكر يوم البعد دموعك
وإنت شايف حلمك يتكسر
وهي اليوم تتمنى رجوعك
بعد ما عرفت قيمتك أكتر
عجيب الوقت مايستناش
يجري يبدل فكر يغير
فنقول كنا ومكوناش
بس ندمنا مش هيأثر
وافرض إن القصة اكتملت
كنت هتضمن تبقى سعيد؟
ياما جوازات بالملايين فشلت
بعد غرام يرعاه كيوبيد

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر