الصــــورة

الا يا سائلن عنّي وعن حالي / عن اخباري ؟
انا والحمدلله بخير وحزني بأطلق شعوره

خذ إقرا صفحة الدنيا وتعرف وينها دياري !
والامن ضاقت (أخباري) عليك اقرأ علي سوره

على الله يا بواقي الجرح فاضت سلة اقداري
سجنت الدمع والضيقه تشيل بداخلي ثوره

تزّف الآه وتدفن وسط نعش الوقت آعذاري
وآخايل هالمسا بنظرات مستوره ومقهوره

عفا الله عن ذنوبك يالقناديل وعن أسراري
وعفا الله عن ذنوب الغيم وحزّت ( مالت الصوره )

وانا واللي خلقهن سبع مشكي شحّة امطاري
ولاني شاكين سبعة عجاف الوقت وقصوره

أشيل الكايده وأبرك على نحر الزمن ضاري
وأعزّ الضيف وآخذ ثار من ضاعت له شبوره

وأغيّر فلسفة فكر الحياه وأعرض افكاري
وأعدّل كل مايل ما تعدّل عن هوا شوره

والامن عوّدت وقفه وصكّ سيوف يا مشاري !
فأنا لي لابةٍ فيها بيوت الحقّ معموره

(بني خالد) والامن قلت : يا عزّي ويا ناري !
تزلزل تحتي الأرض ولفتني فجاج مغموره

صناديدن بيارقهم على المشراف والساري
(سلالة مجد) و (شيوخٍ) بهم هالأرض مغروره

(سطور أمجاد) ما يقوى على استيعابها القاري
حماة (الخيل والليل) وسلاطين أكبر اسطوره

ولكن ضاقت الدنيا علي ورحت يا (مشاري) 1
اخاوي دمعة الليل بخطاوي شبه مستوره

شموخ الذيب في عيني وصوت الجرح بآثاري
ونجوم الليل تقرالي حكاية جرح مأثوره

يا (صوت الجرح) لامرّك سراب (أبوي) متواري
عليك الله تحضني لأخون الدمع وشعوره

يا (صوت الجرح) وش عادت تفيد الوقت انواري
بعد مانا فقدت اللي غشا هالأرض في نوره

يا (صوت الجرح) يا ساري .. مضى في غربته ساري !
ياأصدق من عرف وشهو يضم الصدر في سوره

ماجيت أستبشر الجرح بزوايا صدري العاري
ولا جيت أقدّم أتعابي وسط كفيّن محصوره

ولكن !!ضاقت الدنيا عليّ وهزّني الطاري
وسالت دمعتي غصبن عليّ وسببّتْ ثوره

وآلا يا ناشدن عنّي وعن حالي / عن اخباري
انا والحمدلله بخير , وإنشد عنّي ه(الصوره)