لو جتك ميلة ياقلبي لاتغاربها - سعود القت

لو جتك ميلة ياقلبي لاتغاربها
راس المعرفة يكيل ويضحك حجاجه

الناس منته ولي الها تحاسبها
ولشقتك كلمة جميع الخلق هراجه

نركض مع الارض نسعى في مناكبها
وعلى الولي فك باب الرزق وافراجه

تزين ومرار ماتصفي مشاربها
ونمدح بختنا ولو دعواه منعاجه

اسايس الحظ لو حيباه قالبها
اول حجازيٍ اعصابه بثلاجه

النفس دلو ويد الشيطان تجذبها
وليا ارتواها مشت له حسب منهاجه

لو كل ماجاتني زلة شقيت ابها
ماكان باب العلا فكيت مزلاجه

كم كلمةٍ قربت نفسي حضايبها
اصبر وراع الخطية يكبر احراجه

احشم جهول الاوادم لجل طيبها
والصبر هو بلسم الزعلان وعلاجه

وليا ثناها اتجاهلها واجنبها
وان زاد هدرت جملنا تبطل هياجه

لاخير بوجيه ما تطنا شواربها
والليل يتليه صبح وشمس وهاجه

ممشي برجلي بدربٍ مايناسبها
لو كان في تالي المشوار لي حاجه

دنياً ضروس وعلى الجنبين اقالبها
غريبة اطباعها خدع بتغناجه

تشدي تبختر غنوجٍ عند شايبها
وليا غفل مهتويها تحمي الصاجه

لو ضحكت واربحت زيفٍ مكاسبها
ولا كل من عامها يرهي بمخراجه

سموم الايام تشويني بلاهبها
ولو يجزع القلب محدٍ يسمع اخلاجه

اروم قفريةٍ والكل هايبها
اعوم لي في محيط ترعب امواجه

والفقر روس النشاما مايعذربها
باغ المراجل يصلها لو بدراجه

ومن لا فزع والليالي في مكاربها
وقت الرخا كلٍ مذرع بمدراجه

© 2022 - موقع الشعر