ذكــــــرى اليـــمه

نسيت كل اللي مضى ليه ياصاح
يا صاح من عقبك انأ حالتي غير

ابكي ودمع العين والله ما طاح
لا واهني اللي على خده يسير

حرقة فؤادي تمنع الدمع ينساح
والعبره اللي مالقت منقع البير

خليتني ما بين آآآهات وجراح
رمح(ن) بظهر كليب ادمى به الزير

صاب الخفوق وبين الصمت فضاح
دامه رسم في وجهي الهم تعبير

اموت واحيا والمعاليق مسباح
بيدك تقطع ماجمعت المناثير

تضحك وتدري داخلي قلب نواح
وكانك على فراقي تزف التباشير

هذا جزاي ان الهوى داخلي لاح؟
عطيتك احساس الغلا دون تأخير

يمكن زماني فات مع ماضي راح
وانت بزمان وحكمتك به تغيير

اصبحت ذكرى بالزمن عطرها فاح
ذكرى اليمه ما نستها الأساطير

الطير لو ماعانق الجو بجناح
لا ما رفعت الراس لاشفت لك طير

اعلنت للترحال مفارق افراح
في غربة الأحزان واقولك طير

مديت لي مر العنا وقلت تفاح
ومديت لك مسك الغلا وتنفخه كير

دامي على لقياك ياشوق لحاح
بدعي عسى الدعوه بها لك تأثير

ياعل ربي ياخذ الروح وارتاح
اقلها لامت تذكرني بخير