أبدا بذكر الله من دون تشْكيك
‎خالق جميع الكون عالم بحالك
هو سامعٍ من فوق سبعٍ شكاويك
‎لامن رجيته بالدعا وماجرى لك
لامن دعيته مايخيب رجاويك
يحيطك بحفظه ويرتاح بالك
يزين حظك لو كُتِب في نواصيك
‎هْمومٍ تْكشّف إذا هو نوالك
ومحمد الهادي شفيعٍ يناديك
‎لامن ذكرته بالدعاء وفي سؤالك
ومن بعد قولي ياعضيدي أبهديك
‎بعض الوصايا ياعسى الطيب فالك
أوصيك في علم وصلاةٍ تنجّيك
‎حافظ عليها لاترجّح شمالك
وكتاب ربك بالرخا هو يسلْيك
‎وبالعسر حصنٍ مايخيّب رجا لك
أحرص على السنّة ومنها دعاويك
حافظ عليها تْزين منها خصالك
اكثر صيامك خالقك هو يجازيك
‎وبالحج يدمح كل ذنب وخطى لك
احذر تطيع ابليس بالكذب يغويك
‎وزكاة ربك واجبه من حلالك
وأوصيك في أمك وبرّه يزكّيك
‎تقطف ثمر برّك بيوم ارتحالك
أقدامها جنه تساوي مماليك
‎اذكر وصاتي إن بدا مابدالك
لاتبخل بوصْلك وتقصر خطاويك
‎لأمك وأبوك تشوفها في عيالك
يجيك من صلْبك عيالٍ توذّيك
‎دينٍ يوردْ صاحبه للمهالك
ولازم جدودكْ والوفاء من مباديك
‎والوقت لاضامكْ عليك بخوالك
وعمامك اللي بالمراجل تباريك
‎ماعاشْ من شرّه يجيك وينالك
وأخوك في وقت الشدايد يذرّيك
لضامتك دنياك ذيبٍ برى لك
ولك لابةٍ كلٍ بطيبه يباديك
‎أبْذل لهم ماتملكه من جزالك
أدْناهم اللي مايفكّر يماليك
‎وكبيرهم مثله عريب بفعالك
قبيلة السرحان ربعك وأهاليك
‎هل البويضا بالشدايد ذرى لك
قلايدٍ للخيل ومنهو يعاديك
تكالبوا حولك بليا جدالك
مرباعنا الوادي وتاريخ يرضيك
‎من هول تاريخه بإسمك وفالك
واللي يعزّه والدك مايخلْيك
لاضاقتْ بوجهك جميع المسالك
لاتقطعه بالوصل مثله يعنّيك
‎ولاترده بحاجه إذا هو مشالك
ولا تناسب الا طيبٍ في حراويك
‎عذب النبا طيبه وعلمه زهالك
يهْديك من بيته عنودٍ تداريك
‎كمّل بها دينك إذا هو طرى لك
أنصحْ قريبك لو من السّم يسْقيك
‎وأحرصْ على وصله ولو ماصفالك
ولاتْبيح سر ولاتبيّن خفاويك
‎يتيه فيك إعْداك لا جا مجالك
لا تقاضي اللي مايفكّر يقاضيك
واحفظ حقوق الجار عدْه عقالك
ولاتردْ مضيومٍ ولو هو معاديك
‎أرخص له الغالي اذا هو عنالك
ولاتتبع الجاهل دروبه مشاويك
‎ماينْفعك وتشوف منه المهالك
ومنهو يقفي أتركه لا يخاويك
لامن نخيته قال مالي ومالك
ترى الردي وإن رافقك مايصافيك
‎وراع البلاسه ماصدق وإن حكالك
ولا تامن الخاين يخونك ويرْديك
‎خويك اللي كل ماطحت شالك
رافق خويٍ دايم الدوم شاريك
‎يبدي سلامه ماشكى من وصالك
وقت الرخا هو مايخيب هقاويك
‎ووقت الشدايد لابغيته عنالك  
هذا عديل الروح وهذا يراويك
‎وهذا الذي عمره وماله فدالك
وهذا سبب جرحك وهذا مداويك
وهذا يزيد الجرح ولاهو مثالك
هذي مواثيقٍ ونوره يقدّيك
حافظ عليها تزين فيها حوالك
أرجع لقلبك بالمواقف ينبيك
‎(لاجاد حظك باعلك واشترى لك)
وختامها جنب دروب التهاليك
‎لترافق الخايب علومه تنالك

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
عناوين مشابه
الوقت المطلوب للقراءة
5 دقائق و 31 ثانية
الزيارات

12
© 2019 - موقع الشعر - بواسطة شركة المبرمجين