اسهر واسهرك لك مجرات ونجوم

أسهر واسهر لك مجرات ونجوم
وبحضرة القمرة علينا مطلّه

الليلة الهاجوس به كومٍ(ن) هموم
شكواي للخالق وغيره مذلّه

إسهر معي لا تسرق عيونك النّوم
واصنع لنا من أطيب الكيف دلّه

دام القصيد بهاجسي حايمٍ(ن)حوم
دوك الكلام الي بفهمك تحلّه

بعض البشر يحتاج له فركة خشوم
زودٍ(ن )علي ذلك لسانه نتلّه

وبعض البشر له احترامه ومحشوم
نفسه نزيهة ما يجي منه زلّه

للموت لحضه بالتراقي وحلقوم
يا صانع المعروف لله خلّه

مقبل علينا شهر خيرٍ(ن)به الصوم
شهر العبادة وبهلاله يهلّه

هذي هي الدنيا مصيرك لمرحوم
موتك ولا تعرف مكانه ومحلّه