ياللي تخيلون البروق وتنشدون من العسوس
سحابةٍ هلّت مابلّت كبد الارض رشاشها
ولارعاها الا المطرّف و الدويني والفلوس
والعالم اللي من حطبها ما فَرقت قشاشها
سبحان من سخّر كبار الروس للي مايروس
في حلةٍ يصعب حساب قصورها وعشاشها
الله على بعض الكبود الخاليات من الحسوس
والله على بعض الثياب اللي يهول قماشها
والله على صدرٍ تزاحمه الطواري والهجوس
اللي مااعرف حساب مقبلها ولامنحاشها
وأطحن غثاها بالضلوع العوج وأميّز واقوس
شورين !! شور يقول واجهّا وشورٍ ماشها
وانا مااغِر ان الحميّه طبع والبِرقه لبوس
للعالم اللي كلما صلّت يزيد اجهاشها
واللي يقول ان الدلال تصَب والبن محموس!!
يعتاش من روس الضبا اللي يذكرون عراشها
ماني من اللي ترخي الهامات لكبار النفوس
اللي ليا قدّرت طيّبها بلشت بلاشها
وان ضاقت الدنيا بروسٍ كلّها في سدّ روس
ماضاقت صدور العباد اللي تسوق ادباشها
ماهوب بعيب انثمّن الوقفات في اليوم العبوس
العيب لو نفرش لخلق اللّه غير فراشها
واللي يميّز في العلوم ويستفيد من الدروس
خَلّه يعيش بلحظة ٍ تحسب على من عاشها
وش قصّر يدين الوقوف وطوّل يدين الجلوس؟
كل ٍ يشوف المرجله واللي قِدَرها حاشها
وان كان تبغون الذبيل اللي ورى الصدر محبوس
اللي تذوب اله الحيود الصمّ لامن ناشها؟
ماغيّر طبوع الرجال الزاهدين الاّ الفلوس
ولاهدم هيبة حصون الروم غير اوباشها
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.