المراجل

الشعور احيان ينبش للقرايح
لو يكون الدرب للفكرة وعر

ليت هاجوس" لفاني كان سايح
مير شفته بالحنايا .. مستقر

ودامه استوطن بها ماهو برايح
لين ياخذ علم عن بعض البشر

يرسمون الحزن في وسط الفرايح
يطلقون الضحك في وسط القبر

يحسبون المرجلة ذبح الذبايح
او ركوب الخيل او قنص الصقر

المراجل ماتجيهم بالمدايح
لو شروا ذمة دواوين الشعر

المراجل للي ماشح النصايح
الخلوق اللي تحلى بالصبر

اللي ماخذ شرع ربي له لوايح
الصدوق اللي تمحص للخبر

الكريم اللي عطى يمناه فايح
لو رصيده بالزمن دون الصفر

الشجيع اللي ليا من صاح صايح
مضطهد بالظلم .. بشر بالنصر

واللي فيه الحلم لو الحظ طايح
بالعدل مال لو مال الشجر

العفيف اللي ليا شاف الفضايح
يمسك لسانه ويقصر بالنظر

المراجل ماتجيهم بالشفايح
ولاتحقق بالسوالف والصور

كل زيف يحل بين الناس زايح
من يقول النقش يشبه للحبر