سلام عدة وبل مزن ٍ مراديف
نو ٍ من المنشأ تزبر جويره
يا سيفنا الدايم و يا دايم السيف
ابن الملوك أحفاد صقر الجزيره
أهل الجموع مفرقات المواليف
و اهل المقصب و السيوف الشقيره
حبيت أقدم عندكم باقة الصيف
في ملتقى السواح من كل ديره
شمت هوا تونس و باريس و جنيف
في طلة أبها و الجنوب و عسيره
خواطري مثل السبور المشاريف
المغريات السرد المستذيره
اللي تهاوي طيبين المواقيف
و تهيم في مدح الاسامي الشهيره
تقلط على فيصل ترز الغطاريف
شعر يهيج داخله عبر أثيره
فيصل ولد خالد مغيث الملاهيف
فراج كرب المعضلات الكبيره
المملكه ما رد جيزان لي طريف
عاشت بخير الله بدي ثم خيره
وفيصل سمي اللي فتح خط برليف
يوم انعمت عند الرجال البصيره
و فيصل تعشقه طيبات السواليف
وتخرم لريحة مستكاه و عبيره
عز الله انها تنلقى بهجة الضيف
على كواكب حاجبيك المنيره
يا الهيلع اللي ما تحسب التكاليف
وهايبك تغني اليدين الفقيره
كبر الوهايم للرجال الجوازيف
اللي يشوفون الكبيره صغيره
ولا ترى اللي دايم شبره ضعيف
ما يبغي الا العافيه و الستيره
يا سيفنا الدايم و يا دايم السيف
المعذره كان القصيده قصيره
تمت الإضافة بواسطة: مقبل

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين