الله من هم طرا لي مسيان

الله من همٍ طرالي مسيان
بعد الصريف وفوق ارض مسجّه

في خاطري ما يجعل القلبِ جزعان
يدور فيه الهم لينه يلجّه

يمشي مع دمي على شكل انسان
ويضرب عروقي بالسيوف ويشجّه

وان شاف فرصة يقتحم ربط شريان
يحفر على قلبي على شكل ثجّه

ياطى على لحمي ويثني لي اجران
حتى الخلايا بعثره شغل عجّه

بين الترايب واحدب الضلع لاقان
يقول هذا الطيب بالقلبِ مجّه

احسنت مع ناسٍ يلاقون بالوان
منهم قريب ولاسنٍ في محجّه

ومنهم بعيدٍ من هباهيب اكوان
نذلٍ في علمه رايحٍ فيه صجّه

ماله امان وحسبته مثل شيطان
يحسب علوم الناس لعبة وكَجّة

ان كان تبغا منّي ارحل باحسان
امسك على طيبك بشده وِخِجّه