ياطير ياللي بالسماء قابض اجناح - عبدالرحمن الجربوع

ياطير ياللي بالسماء قابض اجناح
مسهم على قاع شديد الخضاري

عينك تحد الشوف من دون الحاح
وشلون ترصد في جهام المذاري

وانت اللذي ترسي على ردة ارياح
ما تِشْتِكِل عندك عواصف مداري

يمكن علاك الفال في شارق اصباح
لك سانيٍّ منها توكلّ يباري

تغدو خماصٍ والتشابيع مرواح
تحزم امورك من على العز ساري

وتعود لاوكار الطيور ابحمى واح
وتبيت ليلك ماتطالع نهاري

علمك نبيه بسارع الوقت ياصاح
من شان نقلب من حظوظٍ جواري

انا ياخوك انشد مطاليع وارتاح
للي مضالي من على همّ كاري

يومٍ تجين الماقفه دون ما جاح
وايام تبعد غايتي في تواري

نمشي على كف القدر في عنا اكفاح
نجاري افعالٍ تجيك او تحاري

مره نقديها على وسط ما لاح
ومرن يكون الطلق عايب سواري

ومادم فيها الشخص يضرب على باح
اما يصيب السهم ولا يماري

واحيان لاعيبٍ برامي ولوّاح
مير المعيب بوقفة الحظ حاري

والكايده لا جاك سهم على ساح
واتصير نيشانٍ على حد ناري

يضرب بِصَدْقٍ من سهمها على قاح
يزيد من وقع الجروح بسجاري

ويثبت وسط عظمٍ من البعد قد شاح
يبعد وسط لحمٍ من الجلد عاري

وفي ركاب الحظ مانيب مرتاح
اهوِي على يمنىً وَصَبّح يساري

يالله يا عالم بما جاء او ما راح
تضفي على عبدك تلاطيف باري

وتجلي همومٍ من رفاها علي طاح
ما بين ضحوٍ والليالي تداري

© 2024 - موقع الشعر