مايفعـل الرجـل

مايفعل الرجل يبقى له وينسب له
وأنا علي مسهمى وأعرف معدالي

والغصن مايحمل الجذع أيتسرب له
والغصن لاهب ذعذاع الهوى مالي

والليث لاراح عمره يارثه شبله
حكمة ودورات بقعا مالها تالي

عديّت في مرقبٍ كنت أترقب له
والله . يامسهبات المرقب العالي

في ليلةٍ كن داجيها فقد سبله
وأنا علي سهرها رجِلي وخيالي

أضيف بيت القصيدة وأتعزب له
وأجِر من واهجٍ بالصدر موالي

أغني البيت وأسلّم وأرحب له
زادت علّي الطواري وأشغلت بالي

شرايد الفكر والهرج أتحسب له
بنات فكر القصيد الوان وأشكالي

تهزني لسبب لين أتسبب له
وأفطن عليها بمخراجي ومدخالي

وأفند العلم مره وأتعصب له
وأتابع الدرب لين أشوف مدهالي

وأمد حبلي وأعقده وأتكرب له
وآرد علي جمّته وأشرب من أحبالي

الطاري اللي من البعد أتقرب له
وأنا علي نيتي وأمشي علي فالي

لاصب بالفكر ما غير أتصبب له
وأسقيه من صلب راسي هيل فنجالي

أراجعه وأتقرا فيه وأكتب له
وأهم له وأتعمق فيه وأهتالي

والجادل اللي بوسط أعيونها الذبله
أشوف فيها نمط حلّي وترحالي

يكبر غلاها ومنهجها مناسب له
هي مامضى من سنين وماتبقالي

ما كنّها الا عروس وعهدي الدبله
وخصومها هم عدويني وعذالي

عنقا يخضب لها السيف وتخضب له
خوندة الزين سبحان الله الوالي

سمحت محيّا عليها رسمة القبله
فيها تزين القصايد والتغزالي

أخاف للوقت ينشبها وتنشب له
وأخاف لاتجمع الأول علي التالي

وأخاف لاطيش زمرتها تحبب له
وتروح ما بين نيبان أشهب اللالي

أشّرق العلم وأجِنب وأتغرب له
وأشّمل وأسج القدم فالفنتق الخالي

من يعرف الذود مايرخص حليب أبله
واللي يسوق الجمال يقال جمالي

ولاكل واحد سمان الحيل تقصب له
ولايثبت الهرج غير بطيب الافعالي

واللي يقول المهند يرشد الأبله
قولوا له إن الدلّي تضرب علي الجالي