مقابيـس الظـلام - سعد المناديه

لا دعاء داعي بني عمي مقابيس الظلام
سقت رجلي في عجبهم سوقة حصان عزوم

والله أني لا حضر والبي الدعوه شمام
وأتضيف واستضيف وضيف الأجواد معزوم

ما دخلت ولا خرجت إلا مع باب السلام
حاسب حساب الوداع وحاسب حساب القدوم

محتزم بالحضرمية يوم كل له حزام
العذر ما دوره وان جيت سديت اللزوم

دعوة الغالي لها عندي مكانة واهتمام
اعتبرها كوم والدنيا وما تحويه كوم

ويش عذري يالكرام ابن الكرام ابن الكرام
ويش عذري فأبن شداد الحبابي والدسوم

اشهد أن مالي عذر والعذر يلحقني ملام
يوم بعض الناس فاغر لا يلام ولا يلوم

أصبحت الأعذار عند الناس بالكيلو جرام
وبركت بعض الرجاجيل الرخوم أم الرخوم

والا أنا طشيت بالبدلة وخليت الدوام
شمت عنه جعل بنت القرم عني ما تشوم

من غلاكم يا بني عمي تجاوزت النظام
قمت اوطيها حزوم وقمت انطحها حزوم

جيت اشارك حفلكم واثني التحية والسلام
وآخذ علوم على وضح النقا واعطي علوم

في محل عامر بالطيب عام بعد عام
كل عام وكل وقت وكل ساع وكل يوم

يا عزيزين الجناب ويا رفيعين المقام
ويالذيابه يالنشاما يالدواهي يالقروم

يا سلالة هود يا نسل الرياجيل الحشام
يا رجال في نهار الضيق يجلون الهموم

الهمام الله لا يحرمكم الأجر الهمام
الزمان يدور والعربان معطى ومحروم

والرجال الوافية تسعى لتحقيق المرام
وكل وقت له رجال وكل ذود له وسوم

واحمد الله فعلنا واضح مثل بدر التمام
فالسعة بحر لطوم وفالقشر بحر لطوم

ما يعد فعولنا إلا واحد ما هو ينام
واحد لا نام من فالكون كله ما ينوم

اسأله بصفاته الحسنى وبأسماه العظام
يرحم الجنب المتين ويرحم الضلع الزحوم

مارث المجد التليد ومارث السيف الحسام
ما يقارن فيه فرس ولا تقارن فيه روم

وابشر انا في رضاهم جاهدين دام دام
دام راسي حي ويشم الهوى الغربي شموم

المراجل لو يموت العود يارثها الغلام
ارتكي والراس بشماغ الصعاطير محزوم

لو نولف مانولف من تواليف جسام
من كبيرات الجروم ومن صغيرات الجروم

والله انها ما تشيل إلا القيل من العلام
قطرة فالبحر الأحمر ما تحقق له حلوم

والرواية والكتابة شرعها شرع القيام
مالنا منها غناة دام حطمنا الرقوم

وقعها فاصحابنا مثل الموارد والحيام
ووقعها فاخصامنا مثل الخناجر والسهوم

الصحابة وثقوا سنتك يا سيد الأنام
وجمعوا القرآن خوف من محرفة الرسوم

لاصيام ولاصلاة ولاصلاة ولاصيام
لا تصوم ولا تصلي لا تصلي ولا تصوم

يا محرمة الحلال ويا محللة الحرام
ما علينا بايره لا من خصوص ولا عموم

الثقة مزروعة فينا قبل حل الفطام
والولد منا يبيت قوم ويضحي بقوم

ادري ان تاريخنا مثبوت وان الحظ قام
وادري ان فعولنا فوق الثريا والنجوم

ما تحملها الجبال ولا يغطيها الغمام
دايمة ما دامت الدنيا برجليها تقوم

ادري ربعي هل الطالات ما فيهم كلام
قحطان اصل العرب طرق على كل الخشوم

محتمين الماقف الغصاب في يوم الزحام
صناديد الدهات أهل الفعايل والسلوم

الرفيق تقدره والجار يحشم ما يضام
والدخيل تزبنه والضيف يبشر بالشحوم

والخوي يرقى سنود وقسمه علو السنام
والعدو تاطا على علباه وتحطه لهوم

سيفهم يدرك مرامه من صليبات العظام
هم عجب عين الدريك وهم عمى عين الخصوم

للمسالم سلم يرقابه وبرد وسلام
وللمحارب حربة مسمومة وحر وسموم

يشهدون عتيبة وتشهد لنا صبيان يام
وتشهد الغلبا وحمران النواظر والبقوم

يا علي شداد شد الحيل واعبر للإمام
العلوم بحور وانت تعوم وامثالك تعوم

مثلك وشرواك له قدر ومعزة واحترام
محترم والمحترم دايم لبن عمه خدوم

تستحق اطيب وشاح وتستحق أغلى وسام
راوي متعلم وقسمك من خيار القسوم

رحت يام ورحت غرب ورحت شرق ورحت شام
طير حر مخلبه يدمي وفالعليا يحوم

والمعذرة فالبداية والمعذرة فالختام
والسلام ورحمة الله وبركاته للعموم

© 2024 - موقع الشعر