يومين والثالث ترى الحجز اوكيـه - سعد الحويماني

يومين والثالث ترا الحجز اوكيه
على مصر وديار حسني مبارك

شعبا ينادي زايره حضرة البيه
في خدمتك فالليل واول نهارك

مايعرف الدولار بخشيشه جنيه
دايم يهلي بك ويرفع وقارك

لو تعترض فالخط حطوا كباريه
قالوا هلا يابيه والدار دارك

ماعندهم منقود واية مشاريه
شيخٍ ماحد يقدر يخالف قرارك

لوك تقرر فالسماء جسر تبنيه
وتحط لك مركز حدود وجمارك

ويصير لك دوله وجيشٍ توديه
يرجع لك الله كاسب ام المعارك

قالو لك ابشر والطلب لك نلبيه
الشعب في خدمتك وده يشارك

المستحيل اللي عرفته بتلغيه
في واقعك تعلن عليه انتصارك

هذا وفيه النيل ياحلو حاليه
زلال عذب اليا شربته تبارك

فالليل فيه الشعر تضبط قوافيه
كل المعاني النادره بابتكارك

غير الجمال اللي بعينك تراعيه
خضره تحدك من يمين ويسارك

لبيه يا مصر العروبه ولبيه
ياللي مساري مايخالف مسارك

لولاه ماكتب لك قصيدي واغنيه
ومن عاصمتنا مانجي في مطارك

لكن حبيبي كل صيفٍ يقضيه
واليا وصلها قال انا فانتظارك

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر