ضاع الكحل

ضاع الكحل ، واتبعثر الحِسن فيني
و شموعنا ماعاد باقي بها نور

وظِلال ودّك ما تغطّي جبيني
واحساسي المقهور، لازال مقهور

ودموع عيني لاذكرتك، تجيني
والضيقة الي حول أنفاسي تدور

ماهي غريبة، تبعد و ما تبيني
لكن، ذكرت أيام لاحساسك حضور

واذكر كلامك لا بدا يحتويني
كنّه على جمر اللقا كِسرة بخور

واذكرك لا ناديتني: موق عيني
مدري اذا باقي لي بعينك سطور

غِبت وعساك ان رحت ما ترتجيني
حبّيتك بقلبي ، و حبّيتني زور

و يا أول الأيام لا تحرجيني
لاصرت في اخر لياليك مغدور

ويا تالي الرفقه على الله زيني
عسى الذي قد صابني فيه ماجور

استفتح بقلبي و ادوّر ظنيني
وياليت في حب المخاليق لي شور