اطوار الحياة

لـ حاتم منصور، ، في العائلي والاجتماعي، 72، آخر تحديث

اطوار الحياة - حاتم منصور

يا احمد ليه ما نلبس ثياب ٍ بيض نتنعم
و شهّب ثيابنا . . . نشعل بها نار ٍ و نرميها

تعال و نارنا حيه . . . نبي نسهر و نتكلم
تعال و نظهر الخافي . . طويل الليل يرويها

ترى بعض السوالف يا رفيقي كنها بلسم
و لكن بعضها ما آلقى لذيذ ٍ في حكاويها

ترى بعض البشر فقره كلام و ثوبه مهندم
و حنّا ثيابنا ما تشتكي كثّر الوسخ فيها

بعضهم شكلهم حالي و ربي يسمع و يعلم
و حنّا اشكالنا تَظهر بحمد الله . . و كافيها

و ترى بعض البشر جايع لو اصناف الطعام ألتم
على صحنه . . و حنّا نغمس الخبزه بشاهيها

وترى بعض البشر يعطش وهو راوي لحد الفم
و حنّا نارد ابيار ٍ . . . بعيدات ٍ حراويها

و بعضهم يشكي الفاقه و حرمانه و جور الهم
و حنّا تيْبس ارياق ٍ و لا احد ٍ جاب طاريها

تعال و نذكر اطوار الحياه اللي بها ننعم
نبي نجبر بها قلب المعنّى يوم يشكيها

إذا ثياب المعنّى واسعه بيضا طويلة كُم
فحنّا ثيابنا . . . عز ٍ على الهقوه ننقيها

و إذا عنده دراهم ماليه جيبه ما يدري كَم
عزيزه نفسنا . . . و جيوبنا الله يغنيها

و إذا كانت مواترهم جديده و عندهم منجم
فحنّا اقدامنا تسعى على الجنه خطاويها

و إذا كانوا كبار بطون ما تلقى لها منسم
حنّا نفوسنا تَكّرَم عن انواع الردى يجيها

و اذا يشرب قوارير ٍ . . حلاها ورَّد المبسم
فحنّا نسقي الطيبه و نرهي في محانيها

يا احمد لو تضيق إبهم ترفق حالهم . . و اعلم
دراهم تشري هموم ٍ لناس الله مغنيها

يا احمد لا تضيق بهم و لا بالحال . . تتألم
لأن الفرق واضح . . . و الحكيم يفك داعيها

و تاليها تبي تعرف وش الفرق اللّذي يقسم
قناعتنا . . . بكنوز الارض يا غالي ما يشريها

© 2024 - موقع الشعر