داعي الاحساس

يوم أهوجس كل ليله وأغنيّ كل يوم
ودّي أعتق بنت فكري وأفكّ وثاقها

وأتقدّم للقصيده وأنا مالي لزوم
غير أجبرّ ساقها المنكسر وأستاقها

الله اقوى صرت وانا والهجوس أخوان توم
ما تحب فراقي ولا هويت فراقها

شاب رمش القاف والشعر مندوب الهموم
داعي الإحساس والناس حسب أذواقها

حضرته دايم حضوره مخصصّ للعموم
الجماهير الغفيره يهزّ أشواقها

قال في راسك خبر قلت في صدري علوم
وأنته اللي بين راسي وصدري حاقها

وعوّدت خذها وذقها وستر الله يدوم
وقبل يأخذها نديم القريحه ذاقها

الله يجيب المطر لا تلفتّ فالغيوم
المخيله مرّتك وابتسم براقها

علّمتنا العولمه .. دوت نت و دوت كوم
والليالي علّقتنا على معلاقها

آه يا كثر الطواري على بالي تحوم
والعيون المستديره تدور أحداقها

لو تجيني ساريه من مرابيع النجوم
قمت أدقّ إجلالها والتوي بدقاقها

هكذا حال الشقي لا يطيح ولا يقوم
ولو حظوظه طبّقت شالها بأطباقها

ماني بمذنب ولاني من الذنب أمعصوم
مير خزنة خاطري باقها اللي باقها

العوايد من نتاج المذاهب والسلوم
والخلايق يختلف خلقها وأخلاقها

لو تروح القوم صدقان والصدقان قوم
الصداقه ما تعلّمت خلط أوراقها

أضحك وكبدي عليها مثل ضرب السهوم
والنفوس القانعه سرّها بأعماقها

ما غدا بحلومي ألاّ مفسرّة الحلوم
كل بادي صبح ما ينومن ميثاقها

ما رجينا حاجة ٍ من ورا حبّ الخشوم
خذ كبار الروس بالموس ياحلاّقها