تركيبة انفاسي

عرّضت صدري ل الهوا عسا تناهيتي تطير
ملّت تحايلني .. وأنا مليّت أحايل كبتها

هاذي ثلاث شهور كابتها وصارت ما يصير
الى متى تزرع وتحصد في ضلوعي نبتها

مابه زفير إبلا شهيق ولا شهيق إبلا زفير
تركيبة أنفاسي كذا .. خلقه ولا ركّبتها

آقف على جرّ النسم وامشي على سلك الحرير
واقص درب الذاهبه وان جابها الله جبتها

مالي صحيب ولا نديم الاّ العنا .. فقط لاغير
واللي تلوّت في حبال المعرفه حاربتها

والعبره اللي سقتها وعيّا يعبرّها النظير
دحدرتها مع مسلك البلعوم لين أنشبتها

وعقارب الساعه على ذبحي تلفّ وتستدير
وأيامي الغبرا قهر .. من سبتها لا سبتها

واليا ضواني ليل ذقت الويل ف الثلث الأخير
أرقب نجومه وأن بدت شمس الضحى راقبتها

اورّد التوبه .. ليا صدّرت تأنيب الضمير
وأكثر ذنوبي لا تتوبني ولا توبّتها

واطوّل المحراف واردّه على اللحن القصير
وأنا هناديبي على مدّ النظر هندبتها

وأدوّر الخيره .. وأنا خيرّ ولا عيّنت خير
مصلاح وأسعى في صلاح ظنوني وخربّتها

الحال مقطوع الرجا .. والهمّ منقطع النظير
ياربّ نفسي لا تعذبّها .. بعد عاقبتها

يارب لا تجعلني ( الأشقى) موالف زمهرير
والطيبّه ما أخطيتها .. والخيبّه ما صبتها

الخاطر المكسور لا يضحك على العظم الكسير
العظم يجبر والخواطر سايبه .. لا سبتها

لكن يا الرب الغني .. يلوذ بك عبد(ن) فقير
عساك ترحم نفسه وتلطف ليا حاسبتها