وقف على رمشي

لايابعد من سأل عن آخر نتاجي
الشعر يفداك والشاعر .. وجمهوره

لازلت عايش على طبعي ومنهاجي
اليا حضر هاجسي غنيّت ل حضوره

ياتاج راسي لا والله راسي وتاجي
محبّتك في ضلوع الصدر محفوره

من غيرك اللي تعلاّ برجي لعاجي
ووايق على رجم قلبي واسبل شعوره

برجن تعليّت به .. من بدّ لإبراجي
واخذت يوم استويت بقمّته دوره

بنات فكري وراك افراد وازواجي
تدور مسروره .. وتطيح مقهوره

عرضتني ل الهوى ماعاد يحتاجي
وهزيّت غصن الغرام وطارت طيوره

ودخّلتني جوّك .. وضيّعت مخراجي
وجوارحي معك .. منهيّه وماموره

بابور بحري عليك يسابق امواجي
وامواج بحري عليك تسوق بابوره

اهديت لك راحتك واهديت لي ازعاجي
معذور .. وظروفنا ماهيب معذروه

لا تنبش الخافيه .. منعاً ل الإحراجي
خواطر اهل الهوى خجلا ومكسوره

متى تفك القيود وتعلن افراجي
الشيب يزهم عليّ ويرسل سبوره

وقّف على رمشي وسولف مع حجاجي
وانقل عليك الغلا .. بالصوت والصوره