جده غير

يامسافره مع جناح الطير
حسبي على الطير من هدّه

ضفّك جناحه وعينّ خير
وحبال الأشواق ممتدّه

يابنت .. ما للسفر تبرير
خصّن ليا طالت المدّه

انتي تقولين جدّه غير
وانتي بعد غير عن جدّه

جيتي بحرها وجاك مغير
مشتال موجه على يدّه

الموج ودّه يضمّك مير
البحر . ودّه ولا ودّه

يانفحة الشيح والنويّر
سداح باح الجفا سدّه

وش خانة الشعر والتعبير
أبني لك البيت وأهدّه

دايم وطيفك ضحى واعصير
يشنّ هجمات مرتدّه

واليا عرض لي عكست السير
ومسحت خدّي على خدّه

الياس يقضى على التفكير
وافزع ورا الصبر وارتدّه

وانادي الحلم ل التفسير
ولازلت .. ولا زالت الشدّه

من يوم كنتي وكنت صغير
نضحك على العمر ونعدّه

واليا حصل بيننا تقصير
نصدّ .. ولا تبطي الصدّه

لين ابتدا الشيب والتوقير
وعلاقتي معك مشتدّه

محبّه .. وحشمه .. وتقدير
وانفاس واحساس من قدّه

منتي على موجة التغيير
يابنت الأجواد محتدّه

لقياك ما تقبل التأخير
خصّن بعد طالت المدّه

وانتي تقولين جدّه غير
وانتي بعد غير عن جدّه