انتخابات المجلس

وشلون أجي وأروح بسكات
أحيان يزعجني سكوتي

آخذ مع السجّات سجّات
ويقيسها متري .. وفوتي

وأليا وقفت لبدع الأبيات
أفيق وأغنّي بيوتي

وضع البلد وأبليس ما مات
مابين عافت و أمعفوتي

كلّه .. مقّرات إنتخابات
عاده .. عساها ما تموتي

دوب أبتدت حرب الدعايات
معمور بيت العنكبوتي

دواير .. وكذب .. وشعارات
ومن يلحق الكوره يشوتي

(فرعيّه ) وهيّه وفزعات
ولوحات ف الشارع ثبوتي

والعنصريّه وين ما جات
تلوت راس الحق لوتي

هذا يقيم الصبح ندوات
وهذاك يسري بالكروتي

أحدن يشيله ( حلف لابات )
وأحدن معه طقّة بلوتي

عندي عليكم شاهد إثبات
يا أهل العمايم والبشوتي

الشيخ من كثر الخلافات
بالسوط مبسوط وشموتي

يا مجلس الأمّه سلامات
من سطوة كبار البخوتي

الأوّله .. وحسابها فات
والثانيه بكره تفوتي

وأن زوّدوا في سوم الأصوات
في ذمتي ما ابيع صوتي

أخاف من ربّ السموات
اللي كفل شربي وقوتي

و روس الشجر لو طال هيهات
مذموم .. والغصن محتوتي