علموا الطرار حرّيف الطرازه

لـ حسن عامر، ، في الهجاء، آخر تحديث

علموا الطرار حرّيف الطرازه - حسن عامر

علموا الطرار حرّيف الطراره
أن شبّ النار مبداها شراره

هبّ يالمخذول ماتقوى لظاها
تنتهي وتذوب لاونست الحراره

خابرك هتله اذا حان المواجه
ونظم بيت الشعر في وصفك خساره

مثل زبده في نهار القيظ ماعت
وانت تشبهها لكن فيك القذاره

والهجاء في سافلٍ يرفع مقامه
مثل مدحٍ للامير في الاماره

وان جيت احصى وصوفك ماتجمع
فايقه ريح المجاري في زفاره

جلد نيص وذيل كلب وراس حصني
عين بوم وعرف جعر وزقم فاره

تحسب أنك خفتنا يوم انت تهذي
بسّ بيّنت الخساسه والصغاره

وكان في خشمك عرام وشاش راسك
شبّ نارك شوف خصمك شبّ ناره

والله أن اكيل و اوفيك المكايل
وأن تجحر مثل ضبان الجحاره

وانا ماسبّ الرجال اهل المواقف
فعلهم بيّن بتصريح العباره

يحشمون الاوفياء اهل الفعايل
ويحشم الطيب وله هيبة وقاره

لكن الانذال متسلّط عليهم
مثل كف الصقر في صيد الحباره

اقرب اقرب يالذي ثوبك مخوزق
وجهك بيظهر بياضه من سماره

لاتفيصح تحسب أنك مكلماني
مامعك غير التنطع والفغاره

الحصان حصان يكرم عن جنابك
ولاتوصّف بالفرس وانته حماره

والحماره منك أشرف لو ندقق
لن وجهك تتضح فيه العهاره

بالرخاصه والنقاصه ماتساوي
شسع زنجيه على ابواب الدعاره

لومية عامٍ تحط بماي زمزم
مستحيل يبين في جسمك طهاره

في حمانا عشت يوم انك صغيّر
والتنكر للكرام من الحقاره

سوّد الله وجهك ومحقر سواتك
مايسويها النور واهل الغجاره

يوم تشتمنا بلا ذنبٍ جنينا
يوم علمناك بالحقّ ومساره

يا شبيه الموتر اللى قل عزمه
أن وليته ساعه أطير غباره

كان تبغاها قصايد شدّ حيلك
عارفين الشعر قلّه من غزاره

ناوي احوسك وادوسك يالهلامه
بالقدم تاره وبالكفين تاره

لو بغيت انظم مية بيت بدقايق
اسهل من الثوب حين افتح زراره

الشعر من فضل ربي لي سجيه
ماتسلفته ولا اخذ منه عاره

ولا تكسب بالقصايد مثل فعلك
والا امدح الحاكم ولا ادري وين داره

البيوت اذا بغيت انظم قصيده
مثل سيل الحشر في قو انحداره

والقوافي تزدحم عندي بسرعه
كل قافيّه تبي كسب الصداره

واتنقّى واتخيّر فالمعاني
مثل راع الخيل ينقى فى مهاره

كم تجيني قافيه واقول غيبي
فيه غيرك في سراه وفنتظاره

كم من الشعار قد ذاق الندامه
يوم جربّ ميسمي زاد انقهاره

بعض معلومات عني كان تفهم
جاك موجزواحسن العلم اختصاره

الله اللى حولك عندي وجابك
وحظك المنحوس ياضبع المغاره

مامعك عن ميسمي منجا ومهرب
لو تجورّ بالوزير وبالوزاره

ناوي اتوبك من نظم القوافي
وان بقى بك عقل مايمسك قراره

© 2024 - موقع الشعر