أبيات شعري سوط لظهور الهلايم والحثال!

لـ حسن عامر، ، في الحكمه والنصح، آخر تحديث

أبيات شعري سوط لظهور الهلايم والحثال! - حسن عامر

من رافق الأنذال لوهو من مطانيخ الرجال
لابد رفقتهم تدنس سمعته وتعذربه

يارد هماج الماء ولا يشرب من العذب الزلال
من خاشر الانذال وجهه بالنذاله يتربه

ما يكتسب منهم يكون الهيّنه في كل حال
والجرب من قرّب معاطنها جربها يجربه

ترا الحقيقه واضحه للناس مافيهاجدال
الليث لو خاوا الثعالب مثلهم هزّ اذنبه

ابيات شعري سوط لظهور الهلايم والحثال
ومن زعل ينزل فالبحر ويعبّ ماه ويشربه

هذا كلامٍ يوجع اصحاب المهايط والظلال
واللى كلام الحق والصدق النقي مايعجبه

والكفو ما يمشي برجلينه على الجرف الهيال
ذهين ما يحتاج قول الناصح أحذر وانتبه

والذيب مسراحه على روس المشاريف الطوال
فزعته من نابه وذرعانه وقوة مخلبه

والمرجله لوكان تشرى بالجنيه وبالريال
يمدي كثير المال حاز المرجله من مكسبه

حسن عامر آل عيسى
© 2022 - موقع الشعر