بابٍ تفكه مانت قادر تصكه لاتفكه

لـ حسن عامر، ، في الحكمه والنصح، آخر تحديث

بابٍ تفكه مانت قادر تصكه لاتفكه - حسن عامر

بابٍ تفكه ما أنت قادر تصكّه لاتفكه
وبابٍ ما تعرف مخرجه لاتغامر في دخوله

واحذر من الفعل الذي يلبسك ريبه وشكّه
ولاتعلّق نفسك بشي ماتقدر تطوله

والخصم ليمنه تحداك بالباطل فدكّه
مادام وأن الزور والكذب في فعله وقوله

لاتامن الخاين ولو الكلام الزين سكّه
تراه للحيله وطبع المكر يسرج خيوله

وحبل المواصل بالرديين لاتحتار ذكّه
ما فيه عند أهل الردى لاسلوم ولارجوله

من قارب الجربان ملزوم ياجي فيه حكّه
مصيرها تعديه لوكان في باطن رجوله

واللى مقدّر لك ترى ما منه منجا وفكّه
والموت مثل الدين لابد من ساعة حلوله

حسن عامرآل عيسى
© 2024 - موقع الشعر