يا صاحبي لا تحسب اليوم جافيك
والله ما زيلت ساعه عن البال

لو طالت الايام ماني بناسيك
لو كان دونك نازح البعد واللال

الله علي ان كان باجفي واخليك
واطيع بك من لي صديق وعذال

أنشد نجوم الليل لك حل طاريك
وأدور الأخبار عنك واسأل

واطلب من المعبود الله ينجيك
والله يعدل لك صنع كل ما مال

ليت المرض فيني وربي يشافيك
واشيل عنك ما تشيله الاجمال

ويا ليت جرحك من عدو معاديك
أسقيه كاس الموت من بحر الاهوال

مير الشفا يا صاحبي بيد واليك
ولا لي على أمر الولي حيل باحتال

يا صاحبي بروحي العزيزة أنا اشريك
أسوق لك عمري وروحي مع المال

وازعل جميع الناس والله وارضيك
واللي زعل يطق راسه على اليال

انا صديق من قديم مصافيك
ولا تظن في غيرك أدور الأبدال

أحب ما حبيت وأبغض معاديك
زأنا معك يا صاح في كل الأحوال

بليتني بالحب ما كبر بلاويك
وحملتني حمل كما طود الأجبال

مفتون في حبك وموله فيك
وعندك خبر بالحب سموه قتال

واللي وطاني يا اريش العين واطيك
وانا الحمد لله بحاكم الحب ما عال

أصبح مغديني وأمسي معشيك
واذا تواسيني فذي جنة الحال

جازيتني بالعون ربي يجازيك
كم ليله ظلمه تسحب الشال

عنيت لي وجيت الله يحييك
ياللي سميك ينزع النون للدال

مانت بخفي يا صاحبي مير بخفيك
أخاف من بعض المقاريد وانذال

أخاف من بعض العرب وان دروا فيك
أمن الحسد يكثر بما القيل والقال

عندك حجوا فيني وعندي حجوا فيك
والكل منا من الوصل جز الحبال

أقولها ابيت قديم واوصيك
أمير مكه قالها ابدع الأمثال

1930 تقريبا

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر