البدع: محمد المحبي
.
بسم الله قدام قول وقبل مانبدا العلوم
ازهمولي في حسن وقلوا لعيسى لايغيب
ياحسن عندي علومٍ وسط صدري ماترازم
كنها نيران ثاير في دمي شيطانها
...........
.
الرد: عيسى المحبي:
.
مرحبا ياللي تعلون البيارق والعلوم
ياهني المسلم اللي لا ينم ولا يغيب
إنشدوا من يتقن الحسبه متى نو المرازم
والطبيخه نجضوها لو كثر شيطانها
.........
.
البدع حسن عامر
.
مانسينا يامحمد مالعوايد والسلوم
والذي يبدا بذكرالله واسمه مايخيب
ويش هذي المحقريه يامحمد ماتسلم
لا تولع نار فتنه يزعجك دخانها
..........
.
الرد: عيسى المحبي:
.
يا عرب لا تنشبون في المدارج والسلوم
من وضع رجله بجنب الهاويه يمكن يخيب
نطلبك يا ربنا بعض البشر منهم تسلم
ذايقول يود ناس وبعد وده خانها
..........
.
البدع: محمد المحبي:
.
مابنطلب غير ربي ياحسن بالستر دوم
اللي عند الله يبقى دايما منا قريب
والسلام في الضماير دون ماقل واتكلم
الوجيه اتبوحبه قدام نطق لسانها
............
.
الرد: عيسى المحبي:
.
الفتن يا ربعنا حطوا عليها ست ردوم
ما يضيمك مثل طعنه حين تا جي من قريب
والهروج الجارحه تقتل ولو هي ما تكلم
غير بطفي النار قبل تنوشني بلسانها
........
.
البدع حسن عامر
.
ويش تسوي يامحمدلا التقى قوم بقوم
البسوس وناقةٍ جربا سبب ذبحة كليب
كل جيش له سلاح وقاده واركانٍ وعلّم
الرمي يبغا لزم والخيل من فرسانها
...........
.
الرد: عيسى المحبي:
.
قلطة العتبان ما أبغاها ولا حتى البقوم
غير باحول على الشيلات والفديو كليب
وأنا باهبها رموز ولا على بالي نعلم
ما نوينا نطلق اللي موثقه ف رسانها
.........
.
البدع: محمد المحبي
.
فالوغا عندي يمين ولي رفيق ولي عموم
كتفي بكتف الرفيق بدون ماقدم طليب
واقدر ادير المعارك لي سيوفٍ ماتثلم
والخيول في المعارك في يديّ اعنانها
........
.
الرد: عيسى المحبي
.
الحقيقه والنعم يا أثنين وونعم بالعموم
كم نفارع بينكم مثل المطالب والطليب؟
يالله لم الشمل يا ربي على قول المثل لم
برفع الدعوه إلى باب السماء وعنانها
.......
.
البدع حسن عامر
.
ورنا همتك فالميدان يالشيخ الهموم
أمنا مالي عدوّ يكون عبّاد الصليب
من فضل ربي عليّه مابعد عاديت مسلم
واعرف الخيل الأصايل من وحي كرعانها
........
.
الرد: عيسى المحبي
.
يالله ياربي تجنبا المتاعب والهموم
دمت لي ياراسي اللي من خلقك الله صليب
خبروا ياهل الديون أش بقي منها وأيش مسلم
والوثايق في يدي وإن كنت تنكر عانها
........
.
البدع: محمد المحبي
.
ماني متواني ولكني ترا رجلٍ حلوم
والعدو واحد ولابه شك والا علم ريب
نحمد الله منهجي واضح ودربي غير مظلم
والمنيمس ما ارمشت عيني على نيشانها
........
.
الرد: عيسى المحبي
.
الله يسقي يوم كنت أكبر مفسر للحلوم
غير بعض الناس حلمه يعتبر حلمن مريب
صح ف التفسير بعض أوقات نشطح غير ما أظلم
والنوايا الغادره ماهوب مني شأنها
.......
.
البدع حسن عامر
.
يامحمد لو بغيت اطلي الكواكب بالرخوم
والحجر والمرو الابيض في يدي ياجيك ذيب
من يعاندني يعوّد بالقهر مافاد مغنم
والرسائل تعرف المضمون من عنوانها
........
.
الرد : عيسى المحبي
.
نستدل على وجود الذيب الأ سحم بالرخوم
إنتبه يالراعي إن شفت الرخم ياجيك ذيب
لا عدى سرحان يحتاش الغنم مابقي مغنم
ماجرى عابث ونفسه ما نوى عنوانها
..........
.
البدع:محمد المحبي
.
في ميونخ صارقبل اشوي تفجير وهجوم
والوكاد ان داعش اللي قام في هذا الحريب
كم نفوسٍ يزهقوها كم منازل ماتهدم
روسيا من خلفها والحقد جوف ايرانها
.......
.
الرد: عيسى المحبي
.
الطيورأشكال فيها طير حر وفيه جوم
من تكلم بالكلام الصح ما فالصح ريب
مادام الحوثي وداعش ما أنتهوا ماينتهي الدم
يوم طاح الرئس المخلوع جو فيرانها
........
.
البدع حسن عامر
.
السعادة والرخاء بالعمرتمضي ماتدوم
ارض يابن ادم ترا ارزاق البشر قسم ونصيب
من تقلاب الوقوت ومن صروفه لا تظلم
خذ من خيار العلوم ثمانها واسمانها
.........
.
الرد: عيسى المحبي
.
يضحك المجروح بعض أوقات وجروحه تدوم
صح بعض أوقات نخطي لكن الغالب نصيب
هذي الدنيا تدورتدور وتنير وتظلم
وأنا شفت وسومها يا من عرف وسمانها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر