العلوم الصحيحة

لـ فهد بن ناوي الرشيدي، ، في الحكمه والنصح، آخر تحديث

العلوم الصحيحة - فهد بن ناوي الرشيدي

يا صاح ياللي ما صفتلك على الكيف
وشبك .. تضايقت الفجوج الفسيحه

وشبك .. تخالجبك هموم و تصانيف
حتى استهاضت من سببك القريحه

تنهز .... و تنصا النايفات المشاريف
و تطيح .. من دون المشاريف طيحه

مرت عليك .... المصلفات المناكيف
و الضيق ... هج هجوسك المستريحه

يا صاحبي .. حسبك و خل السواليف
و اخذ .... العلوم الصامله و الصريحه

قبلك ...... تحدتنا الليال المعاجيف
و الوقت ... ورانا العلوم الصحيحه

شابت لحانا .... و اذهبتنا الصواديف
و الهم دمدم ... و العواقب كسيحه

دجنا و حطينا الحزن بالسراجيف
و لا همنا ... صد العرب و المليحه

ندفن ...... قهرنا بالظلوع المناحيف
و نشوم .. و لا تطلع من الصدر صيحه

نصبر .. لو ان وجه الفرج ما بعد شيف
و نغيض .. سفلين النفوس القبيحه

لا ما خسرنا .. الا الرخوم الملاقيف
و لا ما كسبنا .. الا الرجال الفليحه

و لا عشنا عالشحذه و عد التكاليف
و مقابل ..... المترديه و النطيحه

و لو انا حسبنا ... للتعب و المصاريف
ما شفتنا .. للضيف جبنا الذبيحه

بلت عطايانا .... الكبود الملاهيف
يوم ... ابخلت هاك اليدين الشحيحه

نعطي ... عطا عذق النخيل المهانيف
لو مرنا .... صلف البراد و لفيحه

طابت فعايلنا ...... بكل المواقيف
و لا ذمنا ...... الا خبيثين الشريحه

مثل الجبل .... ما زحزحتنا العواصيف
و الا العواصف ... كل قشٍ تزيحه

و الفقر .. و هبات الرياح المصاليف
كم ... طيحو من لا هقينا مطيحه

اسمع ... من الأخر و صك المظاريف
اربع بهن .. طب القلوب الجريحه

ثنتين فيهن ... ما تجوز التحاسيف
صدك عن المقفي و قول النصيحه

و ثنتين ما عنهن ... مصد و محاريف
صفق المنايا ... و انتشار الفضيحه

© 2024 - موقع الشعر