لاتصنفوني

بي شاعرة ما أقول عنها عظيمه
أو ابي أقول.وخايفه ترجموني

ياناس-والله- ما عطى الشعر قيمه
مثل الدموع اللي ترتل جفوني

مطارق الدنيا بحرفي وسيمه
واجمل من اجمل نجم كا تنكروني

وأنا صادقه..والصدق يعرف حريمه
لو انكسر بالكون ماتعدلوني

عصر العوج لامر بالمستقيمه
قال:انتي العوجا مع العوج كوني

"أنا المره" ياكل ذمة ذميمه
لي العصور المقبلة واسبروني

عدت انولد من رحم همي واضيمه
واتلى الخطا على كل من همشوني

لي نفس من شر المراجل سليمه
لا تذكرون الشعر..وتأنثوني

روحي مع الانسان..نفسي صميمه
كم أكره التصنيف لا تصنفوني

وابقى شهادة حق..ماني ظليمه
عند الصحيح المر.. ماتشوهوني

وإذا أندفق من جمر قلبي حميمه
تفتن عقول الياس ثورة جنوني

لي غاية باهل العقول السقيمه
كم لوثوا تاريخي..وجرحوني!