اللي على الشده ضعيفه عزومه

من لا يشمر للمواقف كمومه
ما زاح له همٍ ولا نال ناموس

ما تستره بين الخلايق هدومه
مدام ما يلبس من العز ملبوس

واللي على الشده ضعيفه عزومه
تدوسه الدنيا تحت رجلها دوس

وسيفٍ يخبا بالقسا وش لزومه
لاصار ما هو باللقا ينسف الروس

ومن لا تعدي دون حده سهومه
عقب التروس يصبح الصبح مريوس

الخلق ما هي في بعضها رحومه
من طاح تبطش به مخاليب وضروس

من دون حقك لو تطول الخصومه
خلك جبل صامد وجوس الخطر جوس

ولا تلتفت للشر لا صار حومه
عنك بعيدٍ بين ناحس ومنحوس

وابعد عن انذال الزمان ورخومه
لاصار واقعهم بالاحقاد متروس

لو بعضهم يحضى صلاته وصومه
يفرح ليا شافك من الوقت محيوس

لو كان قدامك يزين علومه
شفقٍ يدور طيحتك لو بفلوس

من جنب الانجاس محدٍ يلومه
ما يستعز مرافق ارذال وهدوس

يعيش رجلٍ كل عالي يرومه
راسه رفيع ومحزمه دوم ممسوس

يتبع نهج دينه ويحفظ سلومه
وحب المكارم والشيم فيه مغروس