هرج العرب

يا كثر هرج العرب ياصعب تحليله
الا على من عرف معناه واهدافه

وانا اعرف العلم لكن ما معي حيله
وشلون اعدل سنام الثور واكتافه

ليا جاك خبلاً يحط العلم ويشيله
وليا سمع شاعراً غنى على قافه

يصدقونه ليا سمعوا تهاويله
وهوه كذوباً هيم والصدق ما حافه

وان سمع طاري العزيمه قال منهي له
وقام يتلفت وشال البشت باطرافه

ضاري على المهزله ويعيش بالحيله
لكن عند اللوازم عاش من شافه

ولو تنصحه قال يا دنيا من انتي له
متمرغاً في فراش ابليس ولحافه

وابليس في مرقب الغاوين يومي له
ومشاركه كل مرباعه ومصيافه

له في طريق الخطا تسعين تحويله
لو تاصفه كذبوك الناس باوصافه

ومن كان هذي سواته وش تسوي له
خله يغرف البحر كله بمغرافه

لكن لا تسمع اخباره وتصغي له
يجلس صنم وان ذلف عساه مذلافه