صباح النور - رشيد الدهام

تولم للسفر جفن على درب السهر مجبور
يخفى عن بعض حلمه قبل يرحل بعض ياسه

وانا مثله مسافر بين اراضي حلمي المهجور
معي له كلمتين..ودمعتين..وعين عساسه

ولي وجه تعابيره بها ملح الحزن منثور
شتاته لو نثرته تجمعه نظرات جلاسه

حبيبي كثر ماتخطي على واقول لك:معذور
كثر طول إنشغال البال فيك وكثر هوجاسه

احبك وانت تحكي عن خضوعك لي بكل غرور
مثل من يبكي دموع المذله رافع راسه

أحد يصحى على صوتك ولا يصبح صباح النور
أحد يغفى على صوتك ولا تحلا له انفاسه

أحد يقرا عيونك لابكيت ويكتبك بسطور
أحد يشرب وصوفك لاضحكت وينثرك كاسه

قبل ما أحفر لشعري ياحبيبي ف الضلوع قبور
تعال تضمك حروفه قبل مايلفظ انعاسه

لك الله ياحبيبي صار لي يمكن ثلاث شهور
أسيل بالشعر دم القلم وتموت كراسه

وانا ما همني لو يوم صرت الشاعر المشهور
إذا ما اطرب قصيدي من قراه ولا مس احساسه

عسى بيت القصيد ان ما بنى له ف الصدور جسور
وحرك في النفوس الناس حاجه ينهدم ساسه

إذا ما كان من صادق معاناة ورقيق شعور
عسى ريح الشمال يطير به لاهب نسناسه

© 2024 - موقع الشعر