شبيهة الماء - رشيد الدهام

هلا وغلا يا اغلى الأهل والمعازيم
من وين ما يمي تجيبك جهاتك

مثل القمر لاشع نوره ورا الغيم
وجهك..ورا شفاف طرقة غطاتك

وتحت السما مثل السحاب المراديم
تنهيدتك بمرايتك وزفراتك

أفدا تناهيدك من الحزن والضيم
لا قارنوا حسنك بباقي خواتك

ما أظن فيك الحسن يحتاج تقييم
الحسن ذاته شي من حسن ذاتك

صحيح ياما بالسجن من مظاليم
وياكم سجين ظلمته بعباتك

يا أملح من الدمع...وأحلى من الديم
الملح كله والحلا في صفاتك

شبيهة الما...بالطعم والتقاسيم
أحترت بك ياملحك...وياحلاتك

أحيا بك ان قلتي بك أموت واهيم
واموت فيك ان قلتي اني حياتك

صوتك وتر سابع...وهمسك ترانيم
شيلي اللثام...أو طالبك من غلاتك:

لاتنطقين بشي ياعنيد الريم
لو كان مالي رغبة في سكاتك

لكني أخشى من حريم ملاثيم
لو تنطقين بشي يجرح شفاتك

© 2024 - موقع الشعر