ياجده

انا ماجيت ياجده مجرد طرقي وعساس
ولاجيت اتغزل في بحرك وجزره ومده
مع انك ياعروس البحر تغريني بدون قياس
خصوصا شعرك اللي مااتعب الكوفير في كده
ورزة صدرك اللي علمتنا منطق الاقواس
 
وكيف الردف يبني حلمنا المجنون ويهده
وكيف الورد مات من الوجع في زحمة القرطاس
وذاب اللون وانفاس العطر..والقيظ في خده
وكيف الطهر في بحرك وهم..ياعرقك الدساس
ياكثر انفاس مخنوقه على شاطيك ياجده
ياجده شح صبر العشق وعروق الوله يباس
وضاعت قبلة المسلم على ذمة هل الرده
ولا زلتي عروس البحر..رغم الفقر فالاحساس
ورغم اقبورك اللي عاتبت زفتك فالعده
ورغم اشيا..كثيره..بس محتاجه لربع الكاس
على اربع قوالب ثلج والانغام ممتده
واغني لك على لحن الكذب ..ياشمعة الجلاس
ويمكن وقتها مهما طلبتي عنك مارده
لاني خارج الخدمه..ومعرف منطق الافلاس
وراسي براس..راع البا وراس ابوه مع جده
ياجده بعثري كل الخفايا وارحلي لاباس
وقولي كان يوجعه الهجر ..قبل اعتنق صده
وكنت بعينه اكبر من مدينه ...وكان كل الناس
وكان من الغرور بعشقي يراهن على وده
وكان يمدلي كفه..وفا...واعطيه جفني لباس
الين اتزاحمو بجفني...ونسوني وفا.. يده
ياجده لاتحديني اشق الصدر لاجل الراس
وانا اللي ضد..(علمن يوجعك..لاتستحي..بده)