يا قلب لا تشكي همومك على الناس

لـ فيصل الجابري، ، في غير مُحدد، آخر تحديث

يا قلب لا تشكي همومك على الناس - فيصل الجابري

ياقلب لا تشكي همومك على الناس
وأعرف تراهم إن دروا يجرحوني

لا يخدعوك إن قالوا مليون لا باس
والله ماهو قصدهم يرحموني

يستدرجونك الملاعين الأنجاس
ويستلطفونك عطنا سرّك نصوني

ثم ينشروها كنّهم يتبعوا "واس"
لا بالله أسرع ونشرهم بالظنوني

السرّ خلّه حدّه ما بين الأضراس
ترى إن تجاوز انتشر باللسوني

كلٌ يقول استر ترى الأمر حسّاس
حتى يصل للّي حبيس السجوني

الناس فيهم من هو أغلى من الماس
وفيهم كما رخص البصل أو أدوني

وفيهم اللي لو تحطه على الراس
ما عاد تبغى تنزّله للمتوني

يصمل كأنه صامل الحر قرناس
ينجدك كنّه من سحاب المزوني

وفيهم اللي لو تدوسه وينداس
مداسك اللي داسته ما تهوني

رجّال شكله لكن ابدون احساس
يعجبك في طق الحنك واللحوني

إذا نخيته شفته قدامك احتاس
كأنه عنز من أمهات القروني

اسأل مجرب قد عرف كل الأجناس
بعت وشريت ألين شابت عيوني

ينفعْك من لا ترتجي منه قرطاس
ويخذلْك من كان ترتجي منه عوني

© 2024 - موقع الشعر