ليل السهر - مهدي بن مبارك

أسر يا ليل السهر فرقاك عيد
واضحكي يا شمس في وجه الظلام

مثل ما يضحك على الدنيا بليد
ما يفكر في حلال ..وفي حرام

وشرهة الواقع على الحلم العنيد
كنها الغربي وطره للغمام

أو سراب لا نظرته من بعيد
لا سقى ضامي ولا ورد حيام

كل يوم" فيه لك درس جديد
وتكبر الخبره معك في كل عام

واعرف ان النقص في عمرك يزيد
لاملكت العفر من عقب الجهام

هيه يا دنياي قافينا شديد
يا تمام النقص .. يا نقص التمام

افتني غيري وأنا اللي مستفيد
الله الدايم ولا لغيره دوام

واسمعيني واخذي العلم الاكيد
عز نفسي لا يباع ..ولا يسام

الكفو لا مات سموه الفقيد
والردي وان عاش ملعون الرسام

© 2024 - موقع الشعر