مدحنا

لـ ذيب الشمري، ، في غير مُحدد

مدحنا - ذيب الشمري

مدحنا ناس تستاهل وجربنا الحياه الوان
ومدحنا ناس ماتسوى قصايد ناس تعبانه

وانا متجاهلٍ طيبك علي بالسر والاعلان
وانا لولاك بالاعراب ماحصّل ولا خانه

انا مجبور مادام المراجل شالها الطوفان
اقول اني بدونك موقعي مجهول عنوانه

انا متعّود اخذ منك لامني مدحت انسان
عسى اللي ماقدر يمدح جنابك يقطع لسانه

يزودّني شرف مدحٍ يجي في فارس الفرسان
اخوي اللي شمخ بنيان عزي فوق بنيانه

اخوي اللي بطارف منكبه يفتح لي البيبان
اذا شاف الزمن قدام وحهي صحك بيبانه

اخوي اللي ليا دورّت ماحصلت لي ديوان
اجي له كل حزه واجده مفتوح ديوانه

اخوي اللي جعل وضحى لغه بلسان ابن عدوان
جعلها رمز مشهور مثل خوله وسفانه

جعل لي بالغضب حكمه منحني بالرضا ميدان
مسجل بأسمي الميدان والميدان ميدانه

عطاني من شريفين المبادي بيعةالرضوان
علومي في نظرهم كلها دره ومرجانه

معي دايم يحدثّني ليا من غابت الخلان
ولا افضل من حديثه غير ذكر الله سبحانه

خليلٍ مايبور ولا نخيته كسر القضبان
ولا من طحت يحملني علىصدره وذرعانه

خيار الناس له بقلوبهم قدرٍ كبير الشان
اخوي المعجزه معروف تقديره وسلطانه

ليا منه غضب يخشى غضبه الشيخ والسلطان
سلاطين الدول تحرص على كسبه ورضوانه

يسافر ماتقيّد في نظام المدن والبلدان
ولا يمكن تحاول تمنعه شرطه وهجانه

اخوي اللي على دربه تسير وتتعب الاخوان
خوي اللي تقدرني جميع الناس من شانه

تبون اسمه نعلمكم وكل انسان له ميزان
بتكوين القناعه كل عقل انسان ميزانه

(اخوي الشعر)محمود السجايا وهبةالرحمان
ولا ينلام من يعتز بالطيّب من اخوانه

(تم النقل بواسطة وليد العمودي)
© 2024 - موقع الشعر