البارحـه

البارحه كنيت واليوم ونيت
ونت حمام البيت حول المقامي

وجر قلبي جر غرب تحدر
اقفت تجره جر عجفا سنامي

اقنب قنيب الذيب عجل ا لمهاذيب
اليا قنب قنيب جنح الظلامي

على حسين الدل زين المعزل
عليه دمعي هل مثل الغمامي

وعيونها نجلي بها الموت عجلي
يارب تفرجلي سوات القثامي

ريحه زباد عقيل في قهوة وهيل
ياويل قلبي ويل جوعان ضامي

وريقه حليب خلوف واشعوفها وقوف
بالوادي المصيوف والعشب زامي

قالوا معذب فيه ياناس قلت ايه
ليصار مالي فيه بالود لامي

ويحش قلبي حش زرع(ن) بعد جش
الى ركيبه هش يوم الصرامي

سووا جرينه والعرب محتسينه
والصبح موفينه بعد باغتنامي

واصبح من الى به يصفي ركيبه
تقول لاحسه الجراد التهامي

عقب المقام الزين جوف البساتين خلوه
من بقعة ركيبه قسامي

عليك ياثلاب ياعسل ا لانياب
يابو خديد فيه حاني الوشامي

ذبحتني بالود ياسهيف الخد
وذبح(ن) بليا حق اثام وحرامي