المحبه لازمن تبغي وضــــــــوح - خليفة بن راشد الوالي

من مهاظ الجاش نوحي زاد نوح
والقوافي زود(ن) ني بالنواح

ليش تتلف روح واتزيد الجروح!!
مايفيد الي هلك ضرب السلاح

كيف تتركني جسد من دون روح!!
بعد ما. ادعيتكم سيد الملاح

المحبه لازمن تبغي وضوح
مثل نورالشمس في وقت الصباح

والمحبه يا حبيبي هب مزوح
كلمتن تنقال في وقت إنشراح

والله انها ما مثل نزوه وتروح
وان حصل ما يعتبر شين مباح

كم عطيتك حب وانته لي شحوح
ماخذن حبي دعابه في مزاح

ماتشوف الدمع من عيني نضوح
جرح اخدودي و سوى به جراح

لو بخفيهن عيوني لك تبوح
والقلب ظامي يباله ماء قراح

لك بنيت من المحبه أكبر صروح
كل هذا الي بنيته بساعه راح

للصدر ضيجاته كل ساعه تفوح
هكذا الدنيا كفاحن في كفاح

ما كسبها غير سمحن مع سموح
أوحبيب(ن) تارك(ن) خله وراح !!

© 2024 - موقع الشعر