باقي من الذكرى

لـ متروك العنزي، ، في الانشاد والشيلات، آخر تحديث

باقي من الذكرى - متروك العنزي

اقالوحبيبك راح ماهو بكيفه   
   وانت اتركه مالك بشون المخالييق

وقلبي كفخ بين الضلوع النحيفه
        كفخة نداوي ٍ تتله مسابيق

في لحظة ٍ همي بها سل سيفه
     حسيت كنه طبق الكون تطبيق

وحالي بدت فيها الامور المخيفه
ضاق الفضاء بقلب شكا الهم والضيق

باعيش بعده بالحياة الكسيفه
    هايم على وجه الثرا ناشف الريق

اول ربوع القلب كانت امريفه
      واليوم راحن زاهيات المواريق

شال الأمل منها الزمن مع خريفه
  واحكام ناس ٍ بين كذب ٍ وتلفيق

باقي من الذكرى العلوم الطريفه
  تسوق نفسي للأمل غصب وآفيق

اصحي وجرحي ماتوقف نزيفه  
واقرا كتاب  المترفة والمواثيق

نفسي على ماصار بعده عسيفه
   غصب ٍ علي اصبر ولوكنت ماطيق

لوكانت الوحده عليه كليفه
    كرامتي تبقى بروس الشواهيق

ولاصير مغزى للنفوس الضعيفه
    مابين تحليل ٍ ومابين تعليق

© 2024 - موقع الشعر