الشطرنج

علموني ياجماعه جيت ابسأل واستشير
( مبتدا ) والراي منكم .. يعتبر عندي ( خبر )

ماكتبت الشعر والله .. لجل اباقف بالاخير
من كتبت ( اول ) قصيده .. جيتكم ( باول ) سطر

كل حرفٍ من قصيدي .. يحتوي معنى كبير
كل ( بيتٍ ) فيه ( معنى ) .. وكل ( معنى ) في شطر

ماترجيت المدايح .. من كبير ومن صغير
ويش ابي بمدحٍ يجيني .. من ورى اكتابة شعر

لعنبو حي القوافي .. لابغت تطلع .. كثير
مير ابفهقها .. . واجيكم .. بالكلام .. المختصر

علموني كيف أجامل / واتعامل / مع …….!!
علموني . . كيف ابصبر ؟؟ دام انا .. مابي صبر

هو يصير الطير يمشي بس يمشي مايطير ؟
أو يصير ان كل ( طيرٍ ) بالسما.. يكفخ ، صقر ؟

هو يصير العبد يامر .. علموني هو يصير ؟
أو يصير ان( شيخ ربعه ) .. ياجماعه .. ينومر ؟

هو يصير ان كل منهو قال راي يقول خير ؟؟
أو يصير ان كل ( مهدي ) ايكون ( مهدي ) المنتظر

هو يصير ( الفيل ) يبدا .. ويتعدى ( هالوزير )
أو يصير ( الكنق ) يمشي خطوتين .. ابلاخطر

علموني كيف ياكل ( قلعتي ) ( جندي ) حقير
ولعبة الشطرنج .. تقهر من لعبها.. يابشر

علموني .. قبل ماصل .. لاخر الشطر الاخير
مبتدا .. والراي منكم .. يعتبر عندي .. خب ر

علموني ياجماعه لجل أعاود .. واستخير
علموني كان مخطي .. لجل أدنق .. واع ت ذر !!!