اشعل فتيل القاف وابليس ملعون
في ساحةٍ من حرب جيشه تعاني
ياهي هوايل من مجانين وجنون
لعبواعلى حبل الدلي والسواني
فيهم حسد فيهم مشكات وضنون
فيهم من الشي الدفين الفلاني
قالوا وانا مدري وش اللي يقولون
كلام بالمقلوب عكس المعاني
احيان احس اني من الخلف مطعون
واحيان احس ان السهم مارماني
ياليت عذال المخاليق يدرون
إن الوفاء طبعي وموطن كياني
والله لو يدرون بي ما يعودون
لمعاندي مهما تكون الأماني
حطمت بسيوف الوفاء هام فرعون
وارسيت ببحور الموده مواني
وابدعت بالفكره وسنيت قانون
لحروف شعري قبل يظهر بياني
اما يجي شعري منقح وموزون
وإلا يموت ولا يقوله الساني
ياعاذلي قلّ للعواذيل بالهون
بالهون يالعذال قاصي وداني
ماني من اللي عادته يقبل الدون
ولا يرتضي بالدون غير الهداني
شفني اهناك ان كان لك راس وعيون
متربعاً بايمن سهيل اليماني
عن واطي الهفوات معناي مضمون
وعن الردا حطيت سبع المثاني
ياعاذلي مهما تقول ويقولون
كل العواذل قولهم مارماني

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين