شط لاضي

الرازق الوهاب يعطي وراضي
والامر امره كيف ماكان سوقه

ماكل برقٍ ناض فوق الفياضي
يسقي مخيله ياباستًٍعروقه

وهناك طاير فوق ارض عراضي
الله عطاه.... وميزه في حقوقه

الواسع القادر بخيره يقاضي
محدن يغير وجهته او يبوقه

هذا نماذج وانت حاكم وقاضي
والياس طفلٍ كل عبره تعوقه

حاول تجاهد نظرتك بمتعاضي
فالخير خير الله ورزقك تذوقه

لا تجعل ايامك على شط لاضي
وتموج افكارك على ما تروقه

من يتكي فعله على فعل ماضي
وهواه شَيَّعْ فكرته في عروقه

طراد وهم وطارد الوهم فاضي
يلقى الشقاء بحره وغيًّه وشوقه

تشبه فعوله مثل جدب الاراضي
والطيب حافي في صفاتٍ تسوقه

يعني تساوت فيه كل المعاضي
الحظ ميت واندفن من شروقه

اجمل عباره عنه مافيه عاضي
سقار لاهي في شقاء مايحوقه

الحاكم العادل و بالعدل قاضي
والامر عنده (كن) فيكون سوقه