لعب الحريم

دايم تمرّ بخاطري رغم انّك أصلا به مقيم
وان كان ما صدّقتني قل لي متى وأنا كذوب
 
اكيد لازم ننتظر صَنّاعة السور العظيم
تصنع جهاز اشعار عن خافي المشاعر في القلوب
 
وأكيد لازم ما تصدّق وأنت بحساسي عليم
وتقول بأن الصين صنّاع انحطاطات الشعوب
 
يعني كذوب وما لقلبي عذر يالوجه الوسيم
يا أم الجديل المايس اللي يفتن الورد اللعوب
 
يا آية الابداع يا سلطان شيطان(ن) رجيم
يا أجمل من التصوير لامواج البحر وقت الغروب
 
الحب ماهو كلمة وتعبير باسلوب(ن) رخيم
الحب ماهو باصطناع احساس سحريّ السلوب
 
الحب عفو يقابل اهل الشح بالكف الكريم
الحب شدّ الركب صوب مصوّبك من كل صوب
 
عقل الرجل حرّيف لكن يهزمه لعب الحريم
والثلج معْ قوّته غير انّه بكاس الما يذوب
 
يضيق صدرك كلّما حبيت واشتدّيت ضيم
وأكيد لأنك تحمل انسانين يا الصدر الرحوب
 
والجادل اللي تحمل فجيد الظبي عقد(ن) نظيم
واجب عليها مثلما هي تذنب فوَصْلي تتوب
 
موصالها جنّة وفرقاها لظى نار الجحيم
والمشكلة انّ النار ما تجزي سوى اصحاب الذنوب
 
وأنا لها رغم العنا سالك صراط(ن) مستقيم
وأثْره صراط(ن) لا ذهبته مستحيل انك تأووب
 
يا صاحبي بيني وبينك ألف سين وألف جيم
وألفين بيت وألف دمعة معْ نسايس الهبوب
 
لا بد تعرف بأن قلبي من هنا باله عديم
وأنك مناه وكامل فنظرته لو ثقلك عيوب
 
لازم تعرْف انّ المحب مهما انقهر قلبه رحيم
ولازم تعرْف انّك ولو فارقت شنّيت الحروب