قل المواصل بالمحبّه ترى شين

قلّ المواصل بالمحبه ترى شين
وباري الهجر حدب المحاني براها

أنا أدري الموضوع كلّه .. خيارين
جيّة وصل ، والا بلاها .. بلاها

إلى متى لا قلت حيّاك ذاللحين
جيت بملّفات الحجج و اتلاها

ما هي ترى تحتاج صبرك وبعدين
يا طبّ كبد المنتظر يا دواها

ترى العمر لو قلت لي ممدي سنين
طاوي المنايا لو نعمّر طواها

هجرك سفر لغراب بين البلادين
في جفوة الأوطان محدٍ دعاها

تعال كحّل عين محبوبك بزين
خلك لعينه عقب هجرك دواها

لا صرت كحل العين لا تعمي العين
كم واحدٍ يبغي يكحّل عماها