تــــعـــالـــيـــل

مشغول خلّي بالسهر والتعاليل
وانا على نار آتحرّى مجيّه

طبع النسا ماتترك القال والقيل
لا لا حشا لازم ترد التحيّه

قلبي توقّد بالوله واحرقه حيل
من شافني قال:إرفقوا به خطيّه

لين اغرقت عيني دْموع ٍ هماليل
بالعين دمع وْداخل القلب كيّه

والزين ماتنفع معاه المراسيل
ناسي غيابه زفّني للمنيّه

ماغيراسامر خاطري بالمواويل
يوم افطن ابياتي تباكا عليّه

تقول: يالمشتاق ياويلك الويل
لاصار خلّك ماسأل في خويّه!!

ياناس من يعرف وسيط ٍ مع الليل؟!
كان يْتوسّط لي وياخذ هديّه

قلّه يقصّر هالسهر والتعاليل
حتى يعجّل صاحبي في مجيّه