اللافته

ديرةٍ فيها للأمجاد بنيان وصروح
طافها التاريخ حسبه وهي ماطافته

كلبوها أطلال والورق فأطرفها تنوح
وكل ماناحت يجيك الشقي واحسافته

مابه الاّ لافتتها على مدّ الشبوح
وشيب عيني من معاني حروف اللافته

جيتها جرح وتعدّيتها كلّي جروح
والبلا سرٍّ تطاول على كشّافته

لين قامو يسبرونه , يجي ولاّ يروح
وامغزا جيشٍ ويالله عليك انكافته

قصةٍ تشبه لقصّة نبي الله نوح
يوم قومه حدّو الله بدون امخافته

صاح فيهم بالسفينه ولوحٍ دقّ لوح
لكن الطوفان عيّا على طوّافته

وانت ياللي جيت بين الغشاوه والوضوح
عانك الله تسمع اصوات هجسٍ خافته

مالها والناس والليل سدٍّ مايبوح
لكن القدره خذت منٌك طول امسافته

والله ان السالفه جدّ والعذر المزوح
ومايغربل كل رجّال ياكون آفته

لهفةٍ من بين الاضلاع في صدرٍ يفوح
سامح الله كل ضلعٍ يجرّ (إلهافته)

هذا انا قدّام عينك وروحٍ فوق روح
واقفٍ بالسبع الارواح واللي حافته

أقسم بخّلاقك اني عن الغرّا سموح
عافت الانظار شيِ وهي ماعافته

لك عليّ ان شافت العين برّاقٍ يلوح
انصرف عنّه ولا كنّ عيني شافته