لو همّي اكبر من جبل حضن وطويق

لو همّي اكبر من جبل حضن وطويق
ينزاح يوم أزبن على ابن التهامي

لأنه كفو ويعد في ساعة الضيق
ويزمي بهقواته على كل زامي

متعب ليا عدّوه بين المطاليق
إسمه بطيبه ماتجيه الأسامي

فعله يعجّز به جميع المخاليق
وطيبه شهر به بين يامٍ (ن) وشامي

راقٍ على هامات الامجاد ومويق
وأعلى المراجل لابسٍ له وسامي

حرٍ مخاليبه تقص المعاليق
طير السعد ماهوب فرخ الحمامي

فعل الفقير يوثّق المدح توثيق
كلٍ يقوله فيه ماهو كلامي

وقفات جدّانه ليا نشّف الريق
عدّوا بها من طيب فوق السنامي

أولاد وايل حق ماهوب تلفيق
أمجادهم من جَدّهم في تنامي

كم مزقوا صفٍ للأخصام تمزيق
بحدود هندٍ يشلعن العظامي

طليبهم يُغْشى من الخوف ويفيق
ودخيلهم يهنأ بحلو المنامي

أفعالهم ما تنحصي بالطواريق
لو نطرق الطاروق تسعين عامي

أولاد وايل كالجبال الشواهيق
وأنا أعتبر نفسي خطات القطامي

أنوف واحلّق في الآفاق تحليق
ومزباني إلهم ما ينقّص مقامي

ولو همّي اكبر من جبل حضن وطويق
ينزاح يوم أزبن على ابن التهامي

الشاعر/ يوسف العضياني