حبر العيون

من دم قلبي يا عذارى تحني
صوغوا حكايا القلب في نقش وخضاب

عسى فرحكم وافر بلا تمني
ولا زاركم حزنٍ على وجنتي ذاب

العمر غالي والظروف احكمني
ارخصت بسنيني الين الهدب شاب

كلن جهل بأمري وكلن سألني
وحبر العيون الف دواوين وكتاب

حزني سحابه ارعدت ومطرني
لا شكوتي فادت ولا الصمت لي طاب

ليت الليالي المقفية ما تركني
وليت العيون الغافية لوصلها باب

وليت النجوم بسرهم ماحكني
ولا علقت قلبي على صد وغياب

شمعة امل اطفيتها غصب عني
يوم ذرفت عيني على وعد كذاب

ما عاد بالدنيا جمالٍ فتني
وما عاد في كثر التمني لي اسباب

لأفراح طفله وفرحتي بالتبني
لا حدها عرقٍ ولا بيننا انساب

قدام عيني فرصتي تضيع مني
قدام عيني تهاجر احلامي اسراب

ضعفي وخوفي في حياتي قتلني
كثر المدارى لخاطر الغير وش جاب

لا تهلكون افراحكم بالتجني
حتى القريب بعثرة الحظ يغتاب

هذا انا بسود الليالي اغني
تسبق يدين اعداي طعنان لحباب