مالنا بالسواقه

قلنا الحقوق .. وطالبوا بالسواقه
متقصدين يخدشوا العرض والدين

ما يعرفونا نخاف من ركب ناقه
ما يعرفونا بدون محرم مُدانين

السالفة ماهي ذكاء وحماقه
ولاهي بنقصانٍ بنا يالفطينين

حنا النساء عشنا بعز واناقه
على كتاب الله والشرع ماشين

يمكن بنا جيلٍ خذته الطفاقه
يبغا التحرر خالط الزين بالشين

نسل الحرائر مالهم من علاقه
مطلبهم الانصاف والرفق واللين

مادام صوت الحق صاح بطلاقه
حلوا قضايا خافيه تدمي العين

كم من سجينه بدون عذر واعاقه
بحكم التسلط تنتظر مدة يدين

كم من يتيمه بين ظلمٍ وفاقه
صاحت ولكن المخاليق لاهين

كم من عضيدٍ ما توثق وثاقه
وإلا بزوجٍ به صفات الشياطين

موتر ولابه فرق من كان ساقه
لا رافعٍ قدرٍ ولا منزلٍ طين

حنا النساء ورده تغلف بباقه
بعيون منهم عالمراجل حريصين

خلوا السواقه مالنا بالسواقه
بس اكرمونا بطيبكم يالوفين