يـ ليتك تحبسيني

ي ليتك تحبسيني فيك أزمان
ونتلاقى ولا بيدك خيارين

بحبّي متّهم باشواقي مْدان
وأضمن ما يفرّقنا مكانين

وتتهيّا ضلوع الصدر قضبان
وتنفيني بزنزانة مساجين

وفي صدرك أعيش أفراح إنسان
وفيها نبضه وروحه توارين

وإشراقك يبدّد ليل الأحزان
وإنتي بْمفردك داني وقاصين

وينبت خافقي شريان شريان
وادوّن للهوى بعض القوانين

أساسيّاتها منع أيّ هجران
ي ربّ تْحقّق الآمال آمين

سكوتك ما ترك شيْ طيّ كتمان
عيونك تحكي وْفيها مضامين

عباراتك في العينين تزدان
معانيها نقى ماله مرادين

تدارست احرفك ملهوف بامعان
قريت الصمت مرّات وْملايين

سطوره ما أقدّرها بأثمان
لغة حبْ تختصر أحلى الدواوين

في الغيبة أشوف الويل ألوان
ثوانيها تصير اطول أحايين

وأحزاني زرافاتن ووحدان
وصاب القلب طعنات السكاكين

مبعثر في غيابك مثل دخّان
مشرّد هامشي ماله عناوين

يصيرني رحيلك دون أوطان
ولا همّي نهاياتي إلى وين

وعودك تنتهي دايم بنسيان
تقلّب داخلي كلّ الموازين

سحابة م امطرت فالأرض هتّان
وزهرة تنهدي وْهي ف البساتين

أنا وانتي لْبعَض أرواح وابدان
وشمس الحبْ لنا ترسم ظلالين

أحبّك مملكة والرمش سلطان
واحاسيسي لها أصدق موالين

وحسب الفهم لانّي فيك هيمان
غدى ظلمك عدالة والقسا لين